អាជ្ញាធរគ្រៀងញៀនព្រមានជាថ្មីម្តងទៀតចំពោះម្ចាស់ផ្ទះសំណាក់ ក្លឹបកម្សាន្តនានា លួចប្រើប្រាស់គ្រឿងញៀន
16-March-2020 | ដោយ ពលមនសិការ
ភ្នំពេញ៖ អាជ្ញាធរជាតិប្រយុទ្ធប្រឆាំងគ្រឿងញៀន នឹងចាត់វិធានការច្បាប់យ៉ាងតឹងរឹងបំផុត ចំពោះម្ចាស់ផ្ទះសំណាក់ ក្លឹបកម្សាន្ត និងកន្លែងសប្បាយដ្ឋានទូទាំងប្រទេស ដែលមិនសហការជាមួយអាជ្ញាធរ ហើយបើកឲ្យមានការប្រើប្រាស់ និងជួញដូរថ្នាំញៀននៅក្នុងទីតាំងរបស់ខ្លួន ខណៈដែលគ្រៀងញៀននេះនៅតែបន្តកើតឡើងគួឲ្យព្រួយបារម្ភនោះ។
ថ្លែងប្រាប់ក្រុមអ្នកសារព័ត៌មាន ក្រោយពិធីបើកសន្និបាតបូកសរុបលទ្ធផលការងារត្រួតពិនិត្យគឿងញៀន ឆ្នាំ២០១៩ និងទិសដៅការងារឆ្នាំ២០២០ នៅព្រឹកថ្ងៃទី១៦ ខែមីនា ឆ្នាំ២០២០នេះ នៅទីស្ដីការក្រសួងមហាផ្ទៃ ក្រោមអធិបតីភាព ឯកឧត្តមឧបនាយករដ្ឋមន្ត្រីកែ គឹមយ៉ាន ប្រធានអាជ្ញាធរជាតិប្រយុទ្ធប្រឆាំងគ្រឿងញៀន នាយឧត្ដមសេនីយ៍ មាស វិរិទ្ធ អគ្គលេខានៃអាជ្ញាធរជាតិប្រយុទ្ធប្រឆាំងគឿងញៀន បានក្រើនរំលឹកជាថ្មីម្តងទៀតទៅដល់ម្ចាស់ផ្ទះសំណាក់ ក្លឹបកម្សាន្ត ការ៉ាអូខេ និងកន្លែងសប្បាយដ្ឋាននានា ដែលបើកដៃ ឲ្យមានការប្រើប្រាស់ និងចែកចាយថ្នាំញៀន នៅក្នុងទីតាំងរបស់ខ្លួន និងត្រូវប្រឈមមុខចំពោះមុខច្បាប់ យ៉ាងតឹងរឹងបំផុត និងឈានទៅរឹបអូសទីតាំង និងបិទអាជីវកម្មភ្លាមៗ ព្រមទាំង រឹបអូសទ្រព្យសម្បត្តិដែលបានមកពីការជួញដូរគ្រឿងញៀននេះផងដែរ។
ជាមួយគ្នានោះដែរនាយឧត្តមសេនីយ៍ មាស វិរិទ្ធក៏បានអំពាវនាវទៅដល់ម្ចាស់អាជីវកម្មទាំងអស់ ត្រូវចូលរួមសហការផ្ដល់ព័ត៌មានរហ័សមកអាជ្ញាធរមូលដ្ឋាន នៅពេលសង្ស័យថាមានការប្រើប្រាស់ និងជួញដូរគ្រឿងញៀន នៅក្នុងទីតាំងរបស់ខ្លួន ដើម្បីសមត្ថកិច្ចចុះអន្តរាគមន៍ឲ្យបានទាន់ពេលវេលា និងជៀសវាងកុំឲ្យមានការពាក់ព័ន្ធទៅនឹងការបើកអាជីវកម្មរបស់ខ្លួន។
បើយោងតាមរបាយការណ៍សង្ខេបស្តីពីលទ្ធផលត្រួតពិនិត្យគ្រឿងញៀន ឆ្នាំ២០១៩ និងលើកទិសដៅការងារឆ្នាំ២០២០ បានឱ្យដឹងថា នៅឆ្នាំ២០១៩ គឺជាការអុវត្តផែនការយុទ្ធនាការប្រយុទ្ធប្រឆាំងគ្រឿងញៀន ខុសច្បាប់លើកទី៤ (ពីថ្ងៃទី០១ ខែមករា ដល់ថ្ងៃទី៣១ ខែធ្នូ ឆ្នាំ២០១៩) ដោយអនុវត្តច្បាប់ បង្ក្រាបបានចំនួន៩,៨០៦ករណី ឃាត់ខ្លួនជនសង្ស័យ២០,៤៩០នាក់ រឹបអូសគ្រឿងញៀន បានចំនួន៧៥០,៧០គីឡូក្រាម រួមទាំងមធ្យោបាយ សម្ភារ និងវត្ថុតាងមួយចំនួន។ ក្នុងនោះករណីបទល្មើសគ្រឿងញៀនធំៗ ចាប់បាន០១គីឡូក្រាមឡើង មានចំនួន៦១ករណី (៦១ក្រុម) ចាប់យគ្រឿងញៀនសរុប ៦៩៧,៤៦គីឡូក្រាម និងចាប់ឃាត់ខ្លួនចំនួន ១៤០នាក់ ក្នុងនោះមេក្លោង ២៧នាក់ ខ្សែរយៈបណ្តាញចំនួន ១១៣នាក់៕
ចំនួនអ្នកទស្សនា
- ថ្ងៃនេះ8521
- ម្សិលមិញ15191
- សប្តាហ៍នេះ51671
- ខែនេះ73551
- ឆ្នាំនេះ73551
- សរុប20516007